Ushtruesja e detyrës së shefes së deputetëve të Lëvizjes Vetëvendosje, Mimoza Kusari-Lila ka deklaruar se opozita ka tendencë për prishjen e imazhit të punës së Kuvendit.
Pas dështimit të miratimit të marrëveshjeve ndërkombëtare, ajo theksoi se këto marrëveshje kanë rëndësi të madhe për jetën e qytetarëve të Kosovës.
Ajo në një konferencë për media ka thënë se në seancën e sotme është vërejtur një performancë jo e mirë e opozitës, me arsyetime të paqëndrueshme dhe në dëm të qytetarëve.
“Ne do të vazhdojmë dialogun dhe komunikimin. Asnjëherë nuk ka munguar qasje që të jemi të afërt dhe të dëgjojmë me kujdes dhe të trajtojmë kërkesat e opozitës. Por nuk mund të kemi një miratim të 100 përqind të çdo kërkese që vjen nga ana e tyre. Apo të kërkojmë falje për shumicën që e kemi në Kuvend. Gjithashtu presim që të reflektojmë pozitivisht në domosdoshmërinë e miratimit të këtyre marrëveshjeve”, ka thënë ajo.
Kusari-Lila shtoi se janë tetë projektligje për shëndetësi që priten të miratohen sonte dhe të njëjtat nuk janë kundërshtuar në komision.