VV përkujton Adem Demaçin dhe Enver Zymberin

Lëvizja Vetëvendosje ka përkujtuar sot veprimtarin Adem Demaçi në tre vjetorin e vdekjes dhe heroin Enver Zymberi në 10 vjetorin e vdekjes.

Përmes një komunikate për media kjo parti thotë se, këto dy figura kombëtare na kujtojnë që rrita, jeta e vdekja marrin kuptimin e plotë atëherë kur bëhen me dashuri për vendin e për popullin.

“Jemi në ditë zie pas tragjedisë së djeshme në Kroaci por kujtojmë dy figura të çmueshme për shtetin e shoqërinë tonë, veprimtarin Adem Demaçi që ka përvjetorin e tretë të vdekjes, dhe heroin Enver Zymberi që sot ka dhjetë vjetorin e rënies. Me këto dy figura bëhen bashkë mendimi e ndjeshmëria për çlirimin, shtetndërtimin e zhvillimin e Republikës tonë. Këto dy figura kombëtare na kujtojnë që rrita, jeta e vdekja marrin kuptimin e plotë atëherë kur bëhen me dashuri për vendin e për popullin”, thuhet në komunikatë.

VV tregoi se për t’i kujtuar sot, me lule të freskëta, Kryetari i Lëvizjes VETËVENDOSJE!, njëherazi, Kryeministri, Albin Kurti, bëri homazhe te varret e tyre dhe takoi familjarët e heroit Enver Zymberi.

“Lavdi jetës dhe veprës së tyre dëshmorëve, martirëve, dhe gjithë veprimtarëve që dhanë gjithçka nga vetja që ne ta shijojmë lirinë!”, përfundon komunikata.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Komente Së Fundi