Ish-presidenti i Sllovenisë, Borut Pahor, ka shfaqur dëshirën për të pasuar Miroslav Lajçakun në postin e emisarit të BE-së për dialogun Kosovë-Serbi në Bruksel.
Ambicion e tij e ka përkrahur edhe presidenti aktual i vendit, Robert Golub, por edhe ministrja e jashtme, Tanja Fajon, duke nisur lobim në shtetet anëtare të BE-së.
E vetë Pahor duket se ka nisur të merret seriozisht me rolin që synon ta marrë pas shtatorit.
Kjo pasi në një postim në X, ai ka thënë se është duke e përgatitur një propozim për vazhdim të dialogut mes dy vendeve.
“Ish-presidenti Pahor është duke e përgatitur një draft-kornizë për vazhdimin e dialogut, por ai dëshiron që së pari të koordinohet me Përfaqësuesin e Lartë për Politikë të Jashtme dhe Siguri, Borrell, dhe me shtetet anëtare të BE-së, në veçanti me shtetet e Quint-it”, thuhet në një postim në X nga llogaria e ish-presidentit Pahor.
Në këtë postim thuhet po ashtu se Pahor nuk do t’u përgjigjet pyetjeve apo kërkesave për intervista, deri në njoftimin e radhës.
Miroslav Lajçak do të qëndrojë në postin e emisarit të BE-së për dialogun Kosovë-Serbi vetëm deri në shtator, kur do të marrë detyrën e re, atë të Ambasadorit të BE-së në Zvicër.
Në postin e tij aktual ende nuk është caktuar askush zyrtarisht, dhe publikisht nuk ka ndonjë kandidat tjetër, përpos ish-presidentit Pahor.
“Former President Pahor is preparing a draft outline for the continuation of the dialogue, but he wishes to first coordinate it with the High Representative for Foreign and Security Policy, Borrell, and EU member states, especially the Quint countries.” 2/2
— Borut Pahor (@BorutPahor) April 27, 2024